علاش مانغزروش لتصريحات بن علي بطريقة اخرى وبطريقة ايجابية تخدم مصالح الثورة وتزيح ورقة التوت الاخيرة على الاعيب وخفايا هالحكومة ومحاولاتها العديدة للالتفاف على الثورة واعادة هيكلة دولة الفساد..؟ نرجعه لتالي شوية وتحديدا ليوم 14 جانفي التقارير الكل والشهود اثبتو انه بن علي لاخر لحظة رفض مغادرة تونس وفي اخر خطاب قال غلطوني وكانت عنده النية لمحاسبة الي غلطوه وكان جاد في كلامه غيرشي الوقت فاته والشعب قال كلمته وزيد الحكومة الخفية حضرت للانقلاب عليه لذلك هربوه بش ماتقعش محاسبتهم وظهورهم في الصورة وقتها.الي صار انه نظام بن علي هو الي حب يحرق ورقة بن علي قدام الشعب واستغل ثورة الشعب ومطالبته باسقاط النظام ليوجهها فقط ضد شخص بن علي.
كيما قعد سنين وهو ينظف فيها قبل بش ينجمو يخدمو على راحتهم يغيروا فقط اللون البنفسجي متاعه والقشرة الخارجية للنظام ويبدلوها بقشرة جديدة وبوجه جديد يحضروا فيه من جماعتهم ومن باقي النظام على هذاكا طاحوا يعطيوا في تراخيص لجماعتهم واصحابهم بش يحضرلونا قشرة جديدة ووجه جديد يخدمو به لكن منهم ويضمن تواصل نظامهم.وعلى هذاكا شفنا الاعلام التونسي يركز فقط على بن علي ويحمل فيه اخطاء نظام كامل وكيف يتجبد اسم مسؤول او وزير حالي في ملف دولة الفساد يخفيه ويقطع الصوت وكانها محاولة لجعله كبش فداء يتحمل كل شيء صار في 23 سنة ومن ناحية اخرى في محاولة لامتصاص غضب الشعب لكن بن علي قال غلطوني والي غلطوه ابدا كان شفنا الاعلام التونسي يحكي عليهم ويجبد عليهم والاوينو الصيد وجغام وفريعة ومرجان والمبزع وبكوش والقناصة ووو في ملفات الفساد الي تكشفت على التلفزة لانه باقي رجالهم ومعاونيهم في الاعلام التونسي وماصارش قطع مع الماضي ومحاسبة رموز الفساد لانه رموز الفساد بكل بساطة هوما الي شادين السلطة الان في تونسالسؤال الي يطرح نفسه ويحير بالحق هو علاش تونس 7 ركزت كان على بن علي وعمايلو وحدو شبيها ما عملتشي برنامج على السرقات و الفساد المالي للوزراء و لمسؤولي التجوع ؟ اش بيها ما عملتشي برنامج وثائقي على البوليس السياسي ؟ زعمه نجموا يجيبوا وثائق تخص رئيس دولة و ما نجموش يجيبو متاع الوزراء و متاع البوليس السياسي ؟ زعمه النظام هذا الفاسد الخائن المبزع والسبسي والصيد ما يعنيهمش ماكانش تابعهم ؟ زعمه بن علي كان يحكم و يخون و يسرق وحدوا ؟ اناا نتساءل وينو المبزع والصيد والسبسي وجغام وفريعة ومرجان وباقي وزراء بن علي ومستشاريه والبوليس السياسي من وثائقي الي عداتو تونس 7 على فساد بن علي ام هي محاولة تسليط الضوء و جعله كبش فدااء يحمل انتهاكات وجرائم نظام كامل؟تعرفوا حملة كشف حقائق بن علي الي يقوم بها الاعلام التونسي وفضح تجاوزاته وانتهاكاته وتركيز الضوء عليه هو فقط دون معاونيه او الي غلطوه كيما قال هو وكانه فما محاولة جعله كبش فداء يتحمل كل شيء هي نفس الحملة الي صارت بنفس الطريقة على تشاوشيسكو وزوجته في رومانيا وبعد اعدام تشاوشيسكو وزوجته الشيء الي خلى نفس بقايا نظام تشاوشيسكو واعوانه يتصدره الحكم في رومانيا بعد اقل من عام ونصف ورجعت نفس ممارسات القمع والاستبداد لكل من كان سابقا ضد نظام تشاوشيسكو وكثرت حملة الاعتقالات في صفوف معارضي النظام.خايفة لاهالشيء يتعاود في تونس لوكان يواصل الشعب في سلبية مواقفه من افعال الحكومة وانقساام ارائه
0 commentaires:
Enregistrer un commentaire