بعد 4 اشهر:زيد اسكت وخلي الحكومة تخدم

 اكثر من 4 اشهر توة شنوة الي صار وارضى الشعب التونسي ؟شيء ماتغير بالعكس من قرار الى اخر يستفز في الشعب التونسي وهانا مع بعضنا خطوة خطوة نراجعه رواحنا : بعد4اشهر من 14 جانفي:

1/بن علي هربوه وبعد قالك ييحبو يجيبوه ومازال ما تشدش على خاطر مالقاوش دليل إلي هو قتل 219 شهيد، وتهموه بالتهريب و تبييض الأموال التهمة إلي ماتعطيش الحق للبوليس الدولي بش يشدو على خاطرو معملش جرائم ضد الإنسانية … في حين زميله حسني مبارك متضيف شهرفي السجن على ذمة التحقيق فقط.
2 /ليلى الطرابلسي ماتشدتش وقاعدة تحوس ووتعمل في شوبينغ ويظهرلي هالسيدة الفاضلة خاطيهافي حين سوزان مبارك متضيفة في السجن على ذمة التحقيق 

.3/. الشهيرين الأولانين حكومتين برئاسة الغنوشي عضو الديواني السياسي في التجمع، الحكومة -الأولى تجمعية 100% و الثانية حاطتها فرنسا فؤاد المبزع التجمعي و إلي كان رئيس الديوان السياسي في التجمع رئيس دولة وعندو المراسيم إلي هي بعد حل الدستور في أعلى هرم القوانين 

4/الشهيرين الثانين استقال الغنوشي واستنجد سي المبزع برفيقه في الكفاح البورقيببي وجابلنا من الارشيف البورقيبي سي الباجي قايد السبسي سيد مايعرف فقط كان لغة ان لم تكن معنا فانت ضدنا ويعرف لغة انا فقط نفهم وانتوما ماتفهموش واول حاجة قالهالنا بوسو وخياتكم التجمعيين لامبرر لاقصائهم من الحياة السياسية وكان لزم نرجعوهم لمناصبهم 

5/… الطرابلسية ريوسهم الكبار ما تشدوش و إلي شدوهم ما ريناهمش يتحاكموا كان محمد الناصر الطرابلسي إلي حكمو عليه بشهرين حبس و 45 مليون خطية… بلحسن الطرابلسي مازال يتشخلع في كندا و مالقاولوش تهمة بش يشدوه ويحل في المشاريع… تمثيلية محاكمة عماد الطرابلسي الي داخل للمحكمة تقولش عليه بايت في داره مش في ثكنة عسكرية وزيد يحطولو قاضي حاكم عليه بالبراءة سابقا في قضية سرقة يخوت فرنسية والطرابلسية مشاريعهم ورؤوس اموالهم مزالت تخدم وماتصادرتش فلوسهم ولاكان شيئا لم يكن 

6/ القناصة ماسمعنا حد منهم يتحاكم وزيد الباجي قايد السبسي يقولك تكذبوا القناصة اشاعة ياخي بلكشي يحكيلنا في حكاية قبل النوم ؟انا مافهمتش حاجة توة القناصة الي شدهم الجيش وينهم ؟علاش ماصارتلهمش حتى هوما محاكمة عسكرية ؟على اي اساس السبسي يقول القناصة اشاعة ومافماش منهم ؟اكييد فما حاجة مستند عليها السبسي بش انكر او اخفى وجود
قناصة وبالتالي شنوا عمل الجيش بالقناصة الي شدوهمتوة الجيش هربلنا بن علي وزيد سلمنالو القناصة وشد الطرابلسية وبعد ماشفنا حتى حد من هاذم تحاسب حتى محاكمة عسكرية لا واول محاكمة عسكرية شفناها بعد الثورة كانت للراجحي وحجب صفحات الفايسبوك بامر عسكري . اي شنيااولويات دور الجيش في الثورة ؟

7/إلي عطاو الأوامر بش يضربو بالكرتوش الحي يعملو في الأحزاب جغام وفريعة ومرجان وزراء بن علي يعملوا في احزاب ويلموا في جماعتهم وحتى كان يقع استدعائهم للتحقيق يقعده في حالة سراح تخيل انت كفاش تي الي سارق كرهبة والي يقتل حد على وجه الخطا في حادث سير مايقعدش في حالة سراح ونحن الي يامر باطلاق النار والي يسرق في شعب يقعد في حالة سراح ويزيد نكافؤوه برخصة لانشاء حزب جديد وفي مصر وزراء حسني مبارك الكل في السجن ومحاكمين بمدة لاتقل عن 10 سنوات ؟

8/… التجمع قالو تحل وهو تقسم على أكثر من حزب… التجمعيين يخدمو على رواحهم... التجمعيين يعملو في الأحزاب و يدخلو حتى في لجنة تحقيق أهداف الثورة عن طريق العديد من الوجوه التجمعي الغير معروفة كيف المنجي ميلاد... حزب الوطن متاع محمد جغام و أحمد فريعة يكري في المقار في كل الولايات، و الفلوس الله أعلم منين...

9/عبد الوهاب عبد الله خاطيه وطلع بريئ...علي السرياطي طلع خاطيه عبد الله قلال طلع بريء و خاطيه. وهو مجرم دولي .
قيس بن علي طلع خاطيه و حتى تهمة بيع الخمر خلسه إلي هي ثابتة عليه ما حبوش يوجهوهالو وكملو شدو البوليسية إلي هربوه مالوردانين و قتلو 7 شهداء و جرحوا 14 و هو خاطيه...

10/أمريكا و فرنسا يتسابقوا شكون يشري تونس الأول، فرنسا تحب تحتكر الإستثمارات و تسيطر على الإقتصاد بخارطة طريق صادق عليها البرلمان الأوروبي و أمريكا تحب على قاعدة عسكرية بش تسيطر على المغرب العربي...

11/الحكومة في عوض ما تصلح إلي فسد، أول ما تشد تعين معتمدين تجمعيين و بعد تنحيهم كيف فاق الشعب باللعبة وتخلي منهم 4 معتمدين...يحكيو على مجلس تأسيسي و بعثو تاريخ الإنتخابات لـ 24 جويلية ومبعدو يقولو فما إمكانية بش يتأجل تاريخ الإنتخابات...

12/البوليس السياسي قالو حلوه وقالو 200 عنصر وهوما في تونس7 إعترفو إلي هوما آلاف البوليس السياسي يحرق في الوثائق إلي تدينو الوثائق قاعدة تتحرق بش كيف تطالبهم بحقك يقوللولك جيب دليل

13/المسؤولين مالبره ضربا ضربتين جاي واحد مانعرفوش علاش زعما هذا الكل يلوجو على مصلحتنا وزيد رشيد عمار ماشي جاي على قطر وكيف تقول شفما يجي السبسي ييقلك ماشي يلوج في عروض شغل ...

14/سويسرا وكندا وفرنسا ومسؤولي الخليج تقوللنا ياناس ايجاو هزوا فلوسكم الي سرقوهملكم وبعد تجي تشوف تلقى الحكومة مهيش متعاونة مع هالبنوك بش تجيبلنا فلوسنا ولاهية كان توحل فينا في القروضات 

15/سفير فرنسا في تونس بوريس بويان كان سفير في إسرائيل و العراق وقت الحرب وكل يوم يقابل وزير زعمة علاش؟

16/إهانة للسلطة الرابعة كيف جات هيلري كلينتون بالكلاب متاعها تشمشم فيهم قبل ما يدخل للمؤتمر الصحفي نقمة القناة الصهيونية بامتياز تتهجم على الإسلام وتستقبل الصهيونية هيلاري كلينتون!!

و أخيرا، يستمر التعتيم الإعلامي من وسائل الإعلام الغثيثة التي تعرض المسلسلات البايته و أغاني سنوات السنيما الصامتة و أفلام الأبيض و الأسود، نقمة حنبغل و تونس7 البنفسجية إلى مزبلة التاريخ ويزيد يكذبوا على الشعب ويقلك نحن نمثل صوت الشعب وهوما حتى كلمة على مطالب الثورة ماجبدوهاش.وزيد يعديولنا حربوشة برنامج دولة الفسااد ويقع فيه تسليط الضوء فقط على بن علي وفساده يخلي السؤال الي يطرح نفسه ويحير بالحق هو علاش تونس 7 ركزت كان على بن علي وعمايلو وحدو شبيها ماعملتشي برنامج على السرقات و الفساد المالي للوزراء و لمسؤولي التجوع ؟ اشبيها ما عملتشي برنامج وثائقي على البوليس السياسي ؟ زعمه نجموا يجيبواوثائق تخص رئيس دولة و ما نجموش يجيبو متاع الوزراء و متاع البوليسالسياسي ؟ زعمه النظام هذا الفاسد الخائن المبزع والسبسي والصيد ما يعنيهمش ماكانش تابعهم ؟ زعمه بن علي كان يحكم و يخون و يسرق وحدوا ؟ اناا نتساءلوينو المبزع والصيد والسبسي وجغام وفريعة ومرجان وباقي وزراء بن علي ومستشاريه والبوليس السياسي من وثائقي الي عداتو تونس 7 البارح على فساد بن علي ام هي محاولة تسليط الضوء و جعله كبش فدااء يحمل انتهاكات وجرائم نظام كامل؟تعرفوا حملة كشف حقائق بن علي الي يقوم بها الاعلام التونسي وفضحتجاوزاته وانتهاكاته وتركيز الضوء عليه هو فقط دون معاونيه او الي غلطوه كيما قال هو وكانه فما محاولة جعله كبش فداء يتحمل كل شيء هي نفس الحملة الي صارت بنفس الطريقة على تشاوشيسكو وزوجته في رومانيا الشيء الي خلى نفسبقايا نظام تشاوشيسكو واعوانه يتصدره الحكم في رومانيا بعد اقل من عام ونصفورجعت نفس ممارسات القمع والاستبداد لكل من كان سابقا ضد نظام تشاوشيسكو وكثرت حملة الاعتقالات في صفوف معارضي النظام.

18/تطلعلك كائنات مهجنة كانت قبل 14 جانفي تسب في رجال تالة والقصرين وسيدي بوزيد وهوما معرضين صدوراتهم للكرتوش ويخرجوا هالكائنات بعد خطاب بن علي الاخير يوم 13 جانفي يدربكوا ويغنيوا في انشودتهم المفضلة ^يحيا بن علي ^وهاك الغناء القبيح متاعهم وبعد 14 جانفي يقلبوا الفيستة ويقلك خلي الحكومة تخدم وبش تدخلوا البلاد في حيط وكانه هالبلاد  23سنة ماكانتش داخلة في حيط بالطرابلسية وجماعة بن علي.البارح كيف كانوا الطرابلسية يسرقوا هوما وجماعتهم قالك اقتصادنا نظيف ومؤشرات التنمية عالية والجزيرة غايرة منا وتوة كيف هزووا الطرابلسية ايديهم علىاقتصاد تونس قالك 
اقتصادنا بش يطيح وضعنا ودخلنا في حيط وكانه الطرابلسية يخدمو وحدهم . .ناس مأمنة على ثورتها عاطيتها في يدين زوز 
واحد تربية بورقيبة والاخر نشا في احضان بن علي ويقلك خلي الحكومة تخدم 
.وزراء حسني مبارك وحسني مبارك وعائلته في الحبس في مصر ونحن وزراء بن علي وعائلته يطلعوا براءة ونزيده نكافؤوهم بتراخيص لاحزاب جديدة ويقلك خلي الحكومة تخدم.السبسي يقلك فما زوز حكومات في تونس واحدة صورية في القصبةوالفعلية في قرطاج ويقلكخلي الحكومة تخدم .السبسي يستفز في الشعب ويقول بوسو وخياتكم التجمعين واطلبوا منهم السماح غلطتوا برشة في حقهم ومفماش مبرر لاقصائهم من الحياة السياسية بتونس بل يجب مكافئتهم على خدمتهم تونس 
في مدة 23 سنة باعطائهم تراخيص لتاسيس احزاب جديدة ومشاركتهم فيالانتخابات ونرجعوهم لخدمهم كان لزم ولمراكزهم السابقة ويقلك خلي الحكومة تخدم هالحكومة الكلبة راس البلاء هاك المبزع وزيد جايبلنا صحيبو السبسي بش يعاودولنا سيناريو بورقيبة وبن علي.راهو الدم التونسي والرجال الي عرضت صدرها للكرتوش في تالة وفي القصرين وقت اشباه الرجال قاعدة ساهرة في الحمامات وفي قمرت مش بش يجيوا بقايا بورقيبة وبن علي يحكموا في تونس هذه لازم يفهمها كل واحد يحل في فموا ويقول بش تدخلوا البلاد في حيط راهو الي بكى على كارفور وجيون كيف تحرقوا ومابكاش على الدم التونسي كيف تبزع في تراب تونس عادي تسمع منه هاللغة .تي تصدقوا انا شخصيا يوم 14 جانفي 10 متاع الصباح قدام وزارة الداخلية ونسمع في ناس تمعوق في نفس هالديسك المشروخ في ماعندهم وين يوصلوا,في ساهل هو اسقاط النظام ,في ينبحوا في الفارغ و... وهاك اللغة الي تدل الا على ارتفاع مؤشر سلبية التفكير وعقلية التونسي السياحية 

/و في الاخير عند هالحكومة طلع في الاخر الشعب ظالم.. الشعب مجرم.. الشعب ربي يهديه يظلم في الناس و يتعدى عليهم.. الشعب هو إلي سرق.. الشعب هو إلي عمل الميليشيات.. الشعب قتل روحو.. الشعب ما يخليش الناس تخدم.. الشعب كثرلها.. الشعب شربها و بلع السكينة 


بدمها.. لك الله يا شعب.. لك الله يا تونس




0 commentaires:

Enregistrer un commentaire

Related Posts Plugin for WordPress, Blogger...